ДОРҔООН ДОЙДУ

Бэҕэһээ 17.11.17с. култуура эйгэтигэр биир бэлиэ түгэн буолан ааста.

ДОРҔООН ДОЙДУ--диэн бырайыак аанын аста, сүрэхтэннэ.

Салайааччы Герасим Афанасьевич Павлов.Ыытааччы култуура миниистирин пресс сэкиритээрэ Михаил Серканович Семенов--Мэхээс Сэмэнэп.

Тэрийсээччилэр Донской, Ершов Михаиллар, Гавриил Свинобоев--ааттаах--суоллаах мусукаан Гайаат.

Кыттыыны ыллылар: култуурабыт миниистирэ Владимир Иванович Тихонов көмөлөһөөччүтүнээн Роман Доҕойдооноптуун, ГТОиБ дириэктэрэ Сергей Августович Сюльскай, Уус Аллантан култуура упр.салайааччыта Иннокентий Аммосов,

сахалыы саҥаны баһылаабыт турок уола Шоһин Үмит (Эрэл).О.д.а. баҕа санааларын эттилэр.

Тэрээһин сыала--соруга:

Саха төрүт ырыатын--тойугун, муусукатын, тыыннаах дорҕоону тилиннэрии, саҥа талааннары таһаарыы, дьиҥ саха дорҕоонун киэҥник тарҕатыы.

Үс хайысхалаах:

 Дьүрүскэн,

Хоһоон, хоһуйуу,

Ырыа--тойук.

Бу киэһэ саҕалааһын буолан үс чаастан ордук үс түһүмэҕинэн барда да сылайбыт--элэйбит, салҕыбыт баарын көрбөтүм.

Бастакы түһүмэх:

Кыл--оркестр толоруутугар дьүрүскэн дьүһүйүүлэрэ.

Салайааччы Анна Томская.

Үстүрүмүөннэрин олоччу саталлаах уус Руслан  Габышев эт илиитинэн оҥорбут. Барыта кыл утахтаах, смычога--талах.Улахан саха бөлүһүөгэ эбит.

Оннооҕор сэриилэһэр ох сааны дьиктитик ыллыыр кырыымпаҕа кубулуппут, аны ол оҕо уоһун даҕайда да хомустуу дьүрүлээн киирэн барар.

Дьэ, дьикти...

Иккис түһүмэх:

Хоһоон.

Омук Уола хоһооннорун аахта, ыйытыыларга хоруйдаата.

Сүрэхтэммэтэх кинигэтин манна кэлэн сүрэхтээтэ.

Үһүс түһүмэх:

Ырыа--тойук.

Дьэ, манна тэрийээччилэр бары кытыннылар. Байаан, гитаара доҕуһуоллаах истиҥ--иһирэх сахалыы ырыалар дьэрэйдилэр, куту--сүрү иэйиинэн угуттаатылар.

Кыттыыны ылла үтүөлээх артыыспыт Анастасия Готовцева.

Биир бастыҥ айааччы Мэхээс Сэмэнэп айымньылара үгүстүк иһилиннилэр.

Түмүккэ Тумус Мэхээлэ "Чороонннорго" анаан айбыт Эдэр сааска--ырыатын тардан кэбистилэр. Бу ырыаны атаһым Мохно Болуодьа ыллыыра.

Түмсүү кыттыылаахтара бары хаба тардан ылан көхтөөхтүк ылластыбыт.

Ол курдук сүрдээх истиҥ--иһирэх алтыһыы буолан ааста, саха кута сандаарда, сүрэх сылаанньыйда.

Хаартыскаҕа түстүбүт, үөрдүбүт--көттүбүт, бары астынныбыт.

Тэйийээччилэргэ барҕа махтал!

Дорҕоон Дойду баар буоллун, үүнэ--сайда, сахам дьонун өрүү өрө күүрдэ, үөрдэ--көтүтэ турдун.

Ахтыллыбакка хаалбыттар бука диэн баалаамаҥ, бэйэм баҕа санаабынан сырдаппыта буоллум. Суруналыыс идэтэ суохпун...

Дорҕоон Дойду--саха тыына,

Ырыа--хоһоон уйата.

Дорҕоон Дойду--иэйии кыыма,

Тырымнаатын ыраата.

--Диэн түмүктээн кэбиһиим.

 

Омук Уола, 18.11.2017 с.