Чурапчыга «Добун дорҕоон түһүлгэтэ»

Кулун тутар 27 күнүгэр Чурапчы нэһилиэгин «Айылгы» сынньалаҥ уонна духуобунас киинигэр «Добун дорҕоон түһүлгэтэ» өрөспүүбүлүкэтээҕи бэстибээл бэһис төгүлүн ыытылынна. Бырайыак ааптардара «Халлааҥҥа үрдэл» бөлөх салайааччыта Айсен Борисов уонна «Айылгы» киин дириэктэрэ Гаврил Лыткин.

Былырыыҥҥы 2017 сылтан бэстибээл хабар иэнэ улам кэҥээн, бу сырыыга 12 бөлөх кэлэн ыллаан-туойан, көрөөччүгэ тыыннаах доҕуһуолу бэлэхтээн ааста. Ол курдук, Дьааҥы, Сунтаар, Ньурба, Орто Халыма, Горнай, Мэҥэ Хаҥалас, Чурапчы улуустарыттан уонна Хатас бөһүөлэгиттэн бөлөхтөр оонньоотулар. Үөрүүлээх чааска кытыннылар: «Добун дорҕоон» бастакы кыайыылаахтара Ньурбаттан «Амака» бөлөх (сал. Афанасий Потапов), «Халлааҥҥа үрдэл» бөлөх салайааччыта Айсен Борисов, Чурапчы улууһун култуураҕа салаатын салайааччыта, тыыннаах дорҕоону тарҕатааччы Дмитрий Дмитриевич Попов.

 

Бэстибээл дьүүллүүр сүбэтигэр айар ырыаһыт, суруналыыс, музыкант, хоһоонньут Михаил Семенов, «Дорҕоон дойду» айар түһүлгэ салайааччыта Герасим Павлов, «Эллэйаада» этно-култуурунай холбоһук дириэктэрэ, ХНТ анал сүбэһитэ, өрөспүүбүлүкэ биир бастыҥ продюсера Михаил Ершов, «Айыы сыдьаайа» ырыа ансаамбылын салайааччыта Александра Алексеева-Кулуһун, «Айсар» уопсастыбаннай тэрилтэ бэрэссэдээтэлэ, «Айыы Куо» муода устуудьуйатын салайааччыта, ырыаһыт, худуоһунньук Алесандр Григорьев-Салтааны үлэлээтилэр. Сүрүн успуонсардарынан буоллулар: «АВЕ» уот-күөс тэрилтэтэ, «Дорҕоон дойду» айар түһүлгэ, «Коника» полиграфия өҥөтүн киинэ, «Вектор» төлөпүөн, көмпүүтэр өрөмүөнүн солуона, «Муусукаҕа бүттүүн» бырагыраамма салайааччыта Дмитрий Попов, Е.Дьячковская, улуустааҕы успуорт салалтата, «Үөрүү» оҕо дьоҕурун сайыннарыы киинэ, «Саундчек» улуустааҕы оператордар түмсүүлэрэ, Сылаҥ нэһилиэгиттэн тыыннаах дорҕоону сэргээччи С.Ноговицын, урбаанньыт Александр Егоров. Түһүлгэни иилээн-саҕалаан ыытта «Айылгы» сынньалаҥ киинин режиссера, тыыннаах доҕуһуол сүгүрүйээччитэ Анастасия Егорова.

 

Түмүккэ оҕолорго кыайыылаахтарынан буоллулар:

 

I үрдэл – «Сиккиэр» бөлөх, Сунтаар улууһа, салайааччы Владимир Константинов,

II үрдэл – «Аартык» бөлөх, Ньурба улууһун  Малдьаҕар нэһилиэгэ, салайааччы Айсен Кысылбаиков,

III үрдэл – «Уран Куо» бөлөх, Сунтаар улууһа, салайааччы Владимир Константинов.

 

Улахан дьоҥҥо кыайыылаахтар:

 

I үрдэл – «Дархан», Чурапчы, Мугудай, салайааччылар Вячеслав Михайлов, Николай Толстоухов;

II үрдэл – «Хомуур» Мэҥэ Хаҥалас, Майа, салайааччы Гаврил Колесов;

III үрдэл – Чурапчытааҕы Физкультура уонна успуорт институтун устудьуоннара, Чурапчы нэһилиэгэ, салайааччы Айыына Тимофеева.

 

Кылаан кыайыылааҕынан Орто Халыма улууһуттан «Аккорд» бөлөх ааттанна, салайааччы В.В. Киприянов, уонна 20 000 сууммалаах сертификатынан наҕараадаланна.

 

«Бэстибээл арыллыыта» анал аат Чурапчытааҕы гимназия «Тоҕус томтор» бөлөҕөр туттарылынна, салайааччы Георгий Барашков. Оттон «Бастыҥ саҕалааччы» анал аат Хатас бөһүөлэгин «Кустук» бөлөҕөр тигистэ, салайааччы Николай Андросов. «Төрүт үгэһи сөргүтүү» анал ааты «Үргэл» бөлөх ылла, Чурапчы Мындаҕаайыта, салайааччы Ян Ефимов.

 

Маннык улахан түһүлгэ инникитин кыттааччыта уонна истээччитэ үксээн иһиэҕин баҕарабыт. Саха мусукааннара баалларын тухары – тыыннаах дорҕоон дуораһыйа оонньонуоҕа.

 

Семен ЖЕНДРИНСКЭЙ, Чурапчы