Хатаска оҕолор мусталлар

Тыыннаах дорҕоон, тыыннаах доҕуһуол дуораанаах айана салҕанар.

Кулун тутар 29 к. Хатастааҕы “Тускул” култуура киинигэр бэһис төгүлүн Вокальнай-иструментальнай ансаамбыллар (бөлөхтөр) өрөспүүбүлүкэтээҕи күрэстэрэ буолан ааста. Тэрийээччилэр: СӨ Үөрэххэ уонна билимҥэ министиэристибэтэ, “Саха сирин эдэр олохтоохторо” өрөспүүбүлүкэтээҕи ресурснай киин, “Тускул” култуура киинэ, Хатастааҕы оҕо ускуустубатын оскуолата.

Быйылгы күрэскэ 16 оҕо бөлөҕө кытынна. Саха сирин араас муннугуттан кэлбиттэр: Дьааҥы, Орто Халыма, Эдьигээн, Сунтаар, Ньурба, Горнай, Мэҥэ Хаҥалас, Чурапчы, Хаҥалас, Амма, Хатас уонна Дьокуускай. Кыттааччылар саастара – 9-тан 18-ка диэри.

Бастатан туран, ордук уустук айаннаах хоту дойдуттан уонна Бүлүү эҥээртэн кэлбит бөлөхтөр салайааччыларыгар махтал тылларын этиэх кэриҥнээхпит. Оҕону үөрэтэр уустук. Оттон биэстии-алталыы, ардыгар уонтан тахсалыы оҕону ыраах айаҥҥа, улахан эппиэтинэскэ илдьэ сылдьыах диэтэххэ, хоһуун дьон эрэ сананар дьыалата.

Күрэскэ урукку кыайыылаахтар, лауреаттар туспа сыаналаммыттара кэрэхсэбиллээх. Бириис да ботуччу, тэрийээччилэр бэркэ кыһаммыттар. Арай, бириистэрин кэмигэр биэрэн, тиэрдэн иһэллэрэ буоллар диэн баҕа санаа баар.

Түмүгү көрүөҕүҥ.

 

Анал бириистэр:

 

Ил Дархар истипиэндьийэтэ уонна Ил Дархан харыйатыгар сылдьарга ыҥырыы: Алина Охлопкова, Дьокуускай куорат национальнай гимназията (бөлөхтөрүгэр аат толкуйдуу иликтэр), сал. В.И. Дьячковскай;

“Арассыыйа көмүс иитин” (“Золотое кольцо”) устун айан: “Аккорд”, Орто Халыма, сал. В.В. Киприянов;

“Океан” лааҕырга путевка: “Чаҕаан” бөлөх ырыаһыта Люба Власова, Дьааҥы, сал. Р.Н. Кривошапкин.

 

Анал ааттар:

 

Бастыҥ салайааччы: Владимир Константинов, Сунтаар, Маар Күөл, “Сиккиэр”, “Уран Куо” бөлөхтөр салайааччылара;

Бастыҥ ырыаһыт: Алина Охлопкова, Дьокуускай куорат национальнай гимназията, сал. В.И. Дьячковскай;

Бастыҥ рок-композиция: “Халлааҥа үрдэл”, Чурапчы, Сылаҥ, сал. А.Г. Борисов;

Бастыҥ барабаанньыт: Николай Баишев, “Ситим” бөлөх, Хатас, сал. Н.М. Андросов;

Бастыҥ бас-гитарист: Мария Григорьева, “Ситим” бөлөх, Хатас, сал. Н.М. Андросов;

Бастыҥ гитарист: Антон Борисов, “Халлааҥа үрдэл”, Чурапчы, Сылаҥ, сал. А.Г. Борисов;

Бастыҥ клавишник: Лена Эверстова, “Сиккиэр”, Сунтаар, Маар Күөл, сал., В.В. Константинов;

Бэстибээл эрэлэ: “Сатал”, Хаҥалас, Ороссолуода, сал. Нь.Е. Попов;

Бэстибээл арыйыыта: “Айар бөлөх”, Амма, Соморсун, сал. Н.Н. Протасов;

Саамай кыра саастаах кыттааччы: Айгылаан Николаев, “Кынат”, Хаҥалас, Ой, сал. П.П. Яковлев;

Бастыҥ сыана уобараһа: “Аккорд”, Орто Халыма, сал. В.В. Киприянов.

 

Дипломаннар:

 

3- ист. – “Суһум”, Горнай, Күөрэлээх, сал., С.И. Иванов;

2-с ист. – “Аартык”, Ньурба, Малдьаҕар, сал. А.Г. Кысылбаиков;

1-кы ист. – “Уран Куо”, Сунтаар, Маар Күөл, сал. В.В. Константинов.

 

Лауреаттар:

 

3-с ист. – “Ситим”, Хатас, сал. Н.М. Андросов;

2-с ист. – “Аккорд”, Орто Халыма, сал. В.В. Киприянов;

1-кы ист. – “Куйаар”, Мэҥэ Хаҥалас, Майа, сал. А.Ф. Босиков.

 

Бастыҥнар:

 

Лауреаттар лауреаттара: “Халлааҥҥа үрдэл”, Чурапчы, Сылаҥ, сал. А.Г. Борисов;

Гран-при: “Сиккиэр”, Сунтаар, Маар Күөл, сал. В.В. Константинов.

 

Эппиппит курдук, күрэс бэһис төгүлүн ыытылына. Үс лауреат уонна икки бастыҥ бөлөхтөргө бириис быһыытынан Gibson 2016 Les Paul Studio гитаара сэртипикээттэрин туттардылар.

Күрэс биэстэ ыытыллыбыт буоллаҕына, Сунтаар бөлөхтөрө төрдүс сылын маннык күрэстэргэ кэлэн кыттан бараллар. Сырыы аайы 1-2-с лауреат ааттанар буоллахтарына, быйыл аан бастакытын кылаан бириискэ тигистилэр.

Оттон “Халлааҥҥа үрдэл” – билиҥҥи кэм биир бастыҥ инструментальнай бөлөҕө. Төһө да саастарынан кыра  буоллаллар. Аны туран, бары бииргэ төрөөбүт уоллаттар, кинилэри аҕалара дьарыктыыр. Мантан салгыы бу бөлөҕү Саха сирин тас өттүгэр ханнык эмэ бэстибээлгэ ыыта сылдьыахха наада. “Биһиэхэ маннык дьонноохпут” диэн киэн тутта көрдөрөрдүү.

 

PS: Бүгүн-сарсын (кулун тутар 30-31 кк.) Мэҥэ Хаҥалас Харатыгар эмиэ бэһис төгүлүн тыыннаах музыка бэстибээлэ буолар. Бастакы күн улахан дьон, сарсыныгар оҕолор оонньуохтара. Ол кэнниттэн, аны, Төҥүлү кэтэһэр.

 

Мэхээс СЕРКАН, Култуура уонна духуобунай сайдыы министиэристибэтин Ресурснай бырайыактыыр киинин пресс-сулууспата

Хаартыскаҕа: Сунтаар оҕолоро