Мэҥэ Хаҥалас. “Сааскы тэтим” “Үс Сэргэтэ”

Ханнык баҕарар эйгэҕэ үлэ-хамнас таһаарыылаах уонна туох эмэ түмүктээх буолара биир эмэ баҕалаах, сыаллаах-соруктаах киһи баарыттан улахан тутулуктаах эбит. Холобур, “тыыннаах доҕуһуол” диэн эйгэни ылан көрүөх.

Манна барытыгар дьиҥ “фанат” дьон баара барытын быһаарар эбит диэн түмүккэ кэлэн олоробун. Санаан көрүҥ: сир-сир аайы ВИА (“вокальный-инструментальный ансамбль” диэн этэ, сэбиэскэй саҕана) тэриллэрэ диэн – ханнык эрэ оскуола өҥөтө буолбатах. Чэ, баҕар, ханна эрэ бу туһугар ис сүрэҕиттэн баҕаран туран көмөлөһөр дириэктэр баара буолуо. Баар да дииллэр. Хам-түм.

Ол эрээри тыыннаҕыҥ тухары “тыынааҕы” өрө тутуу, ону ааһан, ол тыыны оҕоҕо-ыччакка тиэрдии мээнэ киһиэхэ бэриллибэт. Оннук дьонтон сорохторун ааттыым.

АНАТОЛИЙ БОСИКОВ – саха рок-музыката атаҕар турар кэмигэр “Сэргэ” диэн бу хайысханы саҕалаабыт биир бастыҥ бөлөҕү салайабытын ааһан, бу хайысханы сөргүппүт “Ый Суола” бөлөҕү тэрийбитэ. Уолаттара уон сыл тухары тохтообокко, арахсыбакка, ыһыллыбакка оонньуу сылдьаллар. Өссө “Туман” диэннээх, уонна “Куйаардаах”

РОМАН КЫСЫЛБАИКОВ – туспа номох. Үөһээ Бүлүү туох баар рок-музыкаҕа үгэһин сүһэн ылан, сылтан сыл ахсын быыкаа оҕолору мунньан үөрэтэн-такайан, бэл, Арассыыйа таһымыгар дуораһытан ааһар. “Хатаны” бары билэр инигит?

ВЛАДИМИР КОНСТАНТИНОВ – Сунтаар улууһун биир быыкаа Маар Күөл диэн бөһүөлэгэр оҕолору үөрэппитэ ыраатта, 4-5 сыл тухары өрөспүүбүлүкэ таһымнаах күрэстэргэ сырыы аайы иккилии бөлөҕү аҕалар. “СИККИЭР” уонна “УРАН КУО” өрүү инники күөҥҥэ сылдьаллр.

АЙСЕН БОРИСОВ – Чурапчы Сылаҥар бэйэтин төрөппүт уолаттарын букатын кыраларыттан дьарыктаан, лаппа таһымнаах бөлөх оҥордо эбээт. Аата – “Халлааҥҥа үрдэл”.

Саха эстрадатыгар 90-с сылларга улаханнык аатырбыт НИКОЛАЙ АНДРОСОВ Хатаска учууталлыыр уонна оҕолору үөрэтэр. Билигин икки бөлөхтөөх. Улахаттара – “СИТИМ” –таһым бөҕөтө.

Мэҥэ Ороссолуодатыгар НЬУРГУСТААН ПОПОВ оҕолоро – “САТАЛ” – сырыы аайы сөхтөрөллөрө үксээн иһэр.

Дьааҥы курдук ыраах сиртэн Саха эстрадатын бастыҥнара ыллыыр ырыаларын ааптара РУСЛАН КРИВОШАПКИН иккис сылын оҕолорун киин сиргэ аҕалан кытыннарар. “ЧАҔААН” диэн дьоһунаах бөлөх туһунан сотору бары да истибит киһи диэн баҕа баар.

 

Итинник салҕаан бара туруохха сөп. Сорохторун ахтыбатах буолуохпун сөп, баалаамаҥ дуу. Күн аайы сүүрбэччэлии бөлөҕү дьүүллүүр сыанан аҕаабата буолуо...

 

Кэлиҥҥи ый устата бу туһунан суруйдум ини, суруйбатым ини... Нөмүгү, Бүлүү, Чурапчы. Хатас... Аны Мэҥэ Хаҥалас Харата уонна Төҥүлүтэ.

 

Бу эйгэ туһунан эрдэтээҥҥи суруйууларга элбэҕи эппитим. Хатылаамыым. Ол эрээри...

 

Быйыл Мэҥэ Хаҥалас Харатыгар бэһис төгүлүн ыытыллыбыт “Сааскы тэтими” тэрийбит, сырыы ахсын биһигини ытыһын үрдүгэр түһэрэн көрсөр Татьяна Степановаҕа улаханнык махтаныам этэ. Тэрээһин – мааны. Барыта уурбут-туппут курдук. Хас биирдии кыттааччы, салайааччы, ыалдьыт – болҕомто киинигэр. Тэрээһин диэн маннык буолуохтаах эбит.

Уонна доҕорбут Григорий Борисовка уонна Төҥүлүтээҕи “Эйгэ” култуура киинин бары үлэһиттэригэр, чуолаан дириэктэр Александра Баишеваҕа махтанабыт.

Тыыннаах до доҕуһуол дьоно уонча күн устата буолбут улахан “марафону” таһымнаахтык тэрийдилэр. Биир да оҕо (ол быыһыгар Орто Халыматтан, Дьааҥыттан кэлбит оҕолор бааллар) сылайбытын көрдөрбөтүн курдук сатабыллаахтык дьаһаммыттар.

 

Онон, доҕоттоор, аһара элбэҕи суруйа сатаабакка, Хараҕа уонна Төҥүлүгэ (Төҥүлү түмүктээтэ) ким туохха тиксибитин билиһиннэрэбин.

 

“СААСКЫ ТЭТИМ”

 

МЭҤЭ ХАҤАЛАС, ХАРА

 

Улахан дьон:

 

I лауреат – “Туман”, Майа-Дьокуускай, сал. А.Босиков;

II лауреат – “Айыллаан”, Мэҥэ Хаҥалас, Хара, сал. Инн. Николаев;

III лауреат – “Хомуур”, Мэҥэ Хаҥалас (Майа, Төҥүлү, Хорообут, Павловскай), сал. П.Дьячковскай;

I дипломант – “Айҕал”, Мэҥэ Хаҥалас, Төҥүлү, сал. П.Заровняев;

II дипломант – “Дархан”, Чурапчы, Мугудай, сал. В.Михайлов.

 

 

Оҕолор:

 

Гран-при – “Сиккиэр”, Сунтаар, Маар Күөл, сал. В.Константинов;

 

I лауреаттар – “Аккорд”, Орто Халыма, сал. В.Киприянов уонна “Куйаар”, Мэҥэ Хаҥалас, Майа, сал. А.Босиков;

II лауреаттар – “Алтан Кыл”, Уус Алдан, Чараҥ, сал Г.Свинобоев уонна “Ситим”, Хатас, сал. Н.Андросов;

III лауреаттар – “Уран Куо”, Сунтаар, Маар Күөл, сал. В.Константинов уонна “Аартык”, Ньурба, Малдьаҕар, сал. А.Кысылбаиков;

 

I дипломаннар – “Чаҕаан”, Дьааҥы, Верхоянскай куорат, сал. Р.Кривошапкин уонна “Төхтүр”, Мэҥэ Хаҥалас, Төхтүр, сал. И.Местников;

II дипломаннар – “Сатал”, Мэҥэ Хаҥалас, Ороссолуода, сал. Нь.Попов уонна “Айар бөлөх”, Амма, Соморсун, сал. Н.Протасов;

III дипломаннар – “Кустук”, Хатас, сал. Н.Андросов уонна “Кынат”, Хаҥалас, Ой, сал. П.Яковлев.

 

Анал ааттар:

 

Бас-гитаара – Дайаана Иванова, “Сиккиэр”;

Барабаан – Артур Свинобоев, “Алтан Кыл”;

Вокал – Туйаарыма Филиппова, “Аартык”;

Гитаара – Алена Кокорина, “Аккорд”;

Инструменталист – Галя Христофорова, “Куйаар”;

Бэстибээл арыйыыта – “Айар бөлөх”;

Ураты тэтимнээх бөлөх – “Алтан Кыл”;

Сахалыы тыыннаах бөлөх – “Аартык”;

Кэскиллээх бөлөх – “Сатал”;

Саамай эдэр кыттааччы – “Кынат”:

Салайааччы – Анатолий Босиков, “Куйаар”.

 

 

“ҮС СЭРГЭ”

 

МЭҤЭ ХАҤАЛАС, ТӨҤҮЛҮ

 

Улахан дьон:

 

Гран-при – “Амака”, Ньурба, сал. А.Потапов;

Лауреат – “Чараҥ”, Уус Алдан, Чараҥ, сал. Г.Свинобоев;

 

Оҕолор:

 

Гран-при – “Аккорд”, Орто Халыма, сал. В. Киприянов;

Лауреат – “Алтан Кыл”, Уус Алдан, Чараҥ, сал. Г.Свинобоев;

Дипломант – “Ситим”, Хатас, сал. Н.Андросов;

Дипломант – “Сатал”, Мэҥэ Хаҥалас, ороссолуода, сал. Нь.Попов;

 

Анал ааттар:

 

Бас-гитаара – Мария Григорьева, “Ситим”;

Барабаан – Артур Свинобоев, “Алтан Кыл”;

Вокал – Люба Власова, “Чаҕаан”;

Гитаара – Алена Кокорина, “Аккорд”;

Клавишник – Даша Винокурова, “Аккорд”;1

Кэскиллээх бөлөх – “Төхтүр”;

Бэстибээл эрэлэ– “Кынат”;

Дьиэ кэргэн ансаамбыла – “Дуорай”.

 

 

Быйылгы күрэс барыта бүттэ. Этэргэ дылы, ким эрэ сынньаныа, ким эрэ аны биир сылы эрэнэ кэтэһиэ. Сөҕө биһириирим баар – бу оҕолору үөрэтэр, уһуйар дьон оҕо сааскы сынньалаҥын кэмигэр ким ханна, хаһан ыытарын быһаарсан кэбиһэр идэлээхтэр. Ол иһин бэйэ-бэйэлэригэр мэһэйдэспэттэр. Үтүөтэ – ыраахтан оҕолору илдьэ кэлээччилэр ону барытын суоттаналлар. Ол баар – сүрүнэ!

 

Култуура министиэристибэтин Ресурснай-бырайыактыын киинин (дир. М.М. Донской) иһинэн үлэлиир “Дорҕоон дойду” айар түһүлгэ (сал. Г.А. Павлов) бу хайысханы, бу хамсааһыны өрүү өйүү туруохтара. Тыыннаах дорҕоон баарын тухары уонна баар буола турарын туһугар. Уонна оттон улуус уонна олохтоох дьаһалталар баһылыктара, култуура уонна үөрэх, ордук эбии үөрэхтээһин салайааччылара оҕолоргут ситиһиилэнэн эрэ кэллэхтэринэ былаах курдук туппакка, ол былааҕы дьоһуннаахтык көтөҕөргө кыттыгастаах буоларгытыгар баҕарабыт.

 

“Дорҕоон дойду” түһүлгэ бары дьонун аатыттан,

Мэхээс СЭМЭНЭП,

Култуура уонна духуобунай сайдыы министиэристибэтин

пресс-киинэ