Ырыа күнэ

Ыам ыйын 19 күнэ – Сахабыт сиригэр ЫРЫА КҮНЭ. Төһө да “официальнай” ааты ыла илик буоллар, быйыл бу күнү бэлиэр алтыс төгүлүн бэлиэтээтибит.

Ырыаны ымыы оҥостубут, ырыа сайдарын, олоххо-дьаһахха туһалыырын туһугар сүрэхтэринэн-быардарынан ыалдьар дьон көмөтүнэн, бу күн хас улуус, нэһилиэк аайы ырыа-тойук чугдаарда. Санаттахха, Ырыа күнүн олохтуур туһунан санааны бастакынан Алексей Калининскай-Луҥха Өлөксөйө көтөхпүтэ. Кинини ырыа айааччылар, түмсүүлэр, ансаамбыллар, хуордар уонна Ксенофонт Дмитриевич Уткин-Нүһүлгэн курдук сүдү дьоммут өйөөннөр, дьон-сэргэ Ырыа күнүн бүтүн омук бырааһынньыгын быһыытынан ылынар буолла.

Ырыа күнүн тэрээһиннэрэ ыам ыйын 19 күнүгэр сарсыарда 11 чаастан Дьокуускайга Ленин болуоссатыгар саҕаланнылар. Төһө да ардах курулаччы куттар, сытыы тыал сирилэччи үрдэр, дьон балайда кэлэ сатаабыт.

Соторутааҕыта тэриллибит Саха сирин Филармониятын хуора, эмиэ бу филармония аркыастырын доҕуһуолунан, Арассыыйа уонна Саха сирин Өрөгөйүн ырыаларын ыллаатылар. Мустубут дьону Ил Түмэн дьокутаата Е.Голомарева, култуура миниистирин солбуйааччы Н.Макаров эҕэрдэлээтилэр. Луҥха Өлөксөйүн уоттаах-төлөнөөх эҕэрдэтин кэнниттэн, Арчы дьиэтин, Айыы Кыһатын, Хатас, Тулагы хуордара, “Дьүрүскэн”, “Оһуор” ансаамбыллар кыттыһаннар, үс ырыаны ыллаатылар: Дьокуускай к. Өрөгөйүн ырыатын, “Ырыа күнэ” ырыаны уонна “Төрөөбүт дойду туһунан ырыаны”.

 

Бу күн ырыа урамньыта сайдарыгар киллэрбит кылааттарын иһин Култуура уонна духуобунай сайдыы министиэристибэтин Махтал суругун туттулар:

- Жирков Владимир Семенович – С.Ф. Гоголев аатынан Дьокуускайдааҕы Педагогическай колледж хормейстера;

- Иванов Иван Васильевич – Кэбээйи улууһун “Ньидьили уолаттара” норуот ансаамбылын салайааччыта;

- Пилецкая Альбина Афанасьевна – С.Ф. Гоголев аатынан Дьокуускайдааҕы Педагогическай колледж хормейстера;

- Окорокова Татьяна Григорьевна – Хатастааҕы “Тускул” култуура киинин хормейстера.

Норуот уус-уран айымньытыгар кылааттарын иһин сыана бэтэрээннэрэ наҕараадаланнылар:

- Тарбахова Антонина Семеновна – “Далбар” норуот ансаамбылын уонна Арчы дьиэтин хуорун солистката;

- Артемьева Наталья Ивановна – “Далбар” норуот ансаамбылын уонна Арчы дьиэтин хуорун солистката.

 

Дьокуускай сүрүн болуоссатыгар киэһээ хойукка диэри ырыа дьиэрэйдэ. С.Омоллоон аатынан Опера уонна балет тыйаатыра, “Туймаада” ырыа судаарыстыбаннай ансаамбыла, Дьокуускай к. айар кэлэктииптэрэ. Өксөкүлээх киинин иһинэн үлэлиир кэлэктииптэр, “Дьүһүй” ырыа кулууба, Ырыа айааччылар сойуустара, Култуура уонна ускуустуба колледжа, Эстрада судаарыстыбаннай тыйаатыра кэнсиэрдээтилэр.

Ырыа күнүн туох баар тэрээһинин тыаһынан-ууһунан, атын да тэхиниичэскэй тэрилинэн Култуура уонна духуобунай сайдыы министиэристибэтин Ресурснай-бырайыактыыр киинэ хааччыйбытын санатабын.

 

Эппиппит курдук, быйыл Ырыа күнүн Саха сирэ алтыс төгүлүн бэлиэтээтэ. Бу күнү дьон-сэргэ билиммитин, сүрэҕинэн-быарынан ылыммытын учуоттаан, өрөспүүбүлүкэ биир дьоһуннаах ааттаах-суоллаах, былаас таһымыгар официальнайдык билиниллибит бырааһынньыгын быһыытынан билинэр уолдьаста.

 

М.СЭМЭНЭП, Култуура уонна духуобунай сайдыы министиэристибэтин Ресурснай-бырайыактыыр киинин пресс-сулууспата.