Эҕэрдэ эйэҕэһин этэбит, айхал бастыҥын аныыбыт!

«Дорҕоон Дойду» Дьаһабыла Дьарааһын Олоҕун Орто Омурҕана!

Ытыктабыллаах Герасим Афанасьевич!

 

Сүһүөхтээх бэйэбит сүгүрүйэн, хоолдьуктаах бэйэбит хоҥкуйан туран, Эйигин үйэ аҥаардаах үбүлүөйгүнэн – 50 сааскын томточчу туолбуккунан – ис сүрэхпититтэн эҕэрдэлиибит!

Эн Саха сиригэр ырыа-тойук, дьүрүскэн-доҕуһуол сайдарыгар дьонтон эрэ ойуччу турар, үгүстэртэн эрэ үрдээн көстөр ураты суолталаах үлэни-хамнаһы ыыта сылдьаҕын. Биһиги кииммит иһинэн «Дорҕоон дойду» айар түһүлгэни тэрийэҥҥин, тиһигин быспакка үлэлэтэҥҥин, саха эстрадатыгар тыыннаах доҕуһуол атаҕар турарыгар, ыллам хардыынан сайдарыгар сүҥкэн кылааты киллэрэр дьоһун киһибит буолаҕын. Кырдьыга, хас биирдии биллэр ырыаһыт айар киэһэтигэр хайаан да тыыннаахтыы ыллыыр түһүмэхтээх буоларын ситиһии – Эн күннэтэ ыытар үлэҥ биир бастыҥ көрдөрүүтэ. Ону таһынан, Сахабыт сирин араас муннугар саһан сытар дьиҥ норуот талааннаахтарын өйүүр, кинилэри киэҥ эйгэҕэ билиһиннэрэр хайысханы тутуһаргын биһириибит. Бу – хас биирдии култуура үлэһитигэр холобур буолар көстүү.

 

Ытыктабыллаах Герасим Афанасьевич!

 

Олоҕуҥ орто омурҕанын бэлиэтиир өрөгөйдөөх күҥҥэр Эйиэхэ байылыат олоҕу, чугас дьоҥҥор уонна тус бэйэҕэр чиҥ уонна чөл туругу, ыра санааҥ ыпсан иһэригэр, баҕа санааҥ туола турарыгар ис сүрэхпититтэн баҕарабыт! Эн курдук хараҕар уоттаах, сүрэҕэр төлөннөөх, айар куттаах киһини кытары бииргэ үлэлиирбитинэн, күннэтэ алтыһарбытынан киэн туттабыт!

 

 

Ытыктабылы кытары, СӨ Култуураҕа уонна духуобунай сайдыыга министиэристибэтин Ресурснай-бырайыактыыр киинин үлэһиттэрэ