Аммалар Валерий Ноевка анаммыт ыскамыайкаҕа сибэкки дьөрбөтүн уурдулар

Амма туһунан кэрэ ырыалары суруйан хаалларбыт биллиилээх, дьиҥ чахчы норуот ырыа айааччыта Валерий Ноев бүгүн баара буоллар 80 сааһын томточчу туолуо этэ. Биир дойдулаахтара кинини кэриэстээн аналлаах ыскамыайкатыгар сибэкки дьөрбөтүн уурдулар.

  “Үбүлүөйдээх тэрээһиннэр бүгүн сарсыарда 7 чаастан саҕаланнылар диэххэ сөп. Ол курдук сахалыы сонуннарга үбүлүөйүнэн эҕэрдэлэр барбыттара. “Виктория” радиостанцияҕа “Ааспыт кэм ахтылҕана” диэн Валерий Ноевка анаммыт биир чаастаах биэрии буолбута. Онно кини ырыалара иһиллибиттэрэ, үйэтиигэ анаммыт үлэлэр тустарынан кэпсэппиппит. Онтон күнүс 12 чаастан Карл Маркс скверигэр баар “Ырыа ыллыга” диэн ыскамыайкалар быыстарыгар турар Валерий Ноев ыскамыайкатыгар сибэкки дьөрбөтүн уурдубут. Манна кыттыыны аммалар түмсүүлэрин сэргэ, “Бэдьимэ” түмсүү эмиэ кыттыыны ылла. Кэлбит дьон Валерий Власьевич туһунан истиҥ сылаас тыллары эттилэр”,- диэн кэпсээтэ Валерий Ноевы үйэтитиигэ күүскэ үлэлэһэр Саргы Адамова – Алтан кыыс.

  Үйэтитии, ахтылҕан тэрээһинигэр мелодист кыыһа Анастасия Чирикова кыттыыны ылла, аҕатын туһунан туох өйдөбүллээҕин үллэһиннэ. Өссө Дьокуускай куорат киин уулуссатыгар, Ленин проспегар күнүс 13 чаастан 14 чааска диэри Валерий Ноев уостан түспэт ырыалара дьиэрэйэн олох саҥа, сонун буолла. Тапталлаах мелодиспытыгар анаммыт тэрээһиннэр өссө да салҕанан бараллар. Бүгүн киэһэ 18 чаастан саха араадьыйатын “Тыыннаах дорҕоон” биэриитигэр быһа эфир буолуо. Бу биэриини тэлэбиисэринэн сэтинньи 23 күнүгэр көрүөхпүт. Онтон улахан түмүктүүр тэрээһин ахсынньы 7 күнүгэр Дьокуускай куоракка ыытыллыа.

 

Ааптар: “Амма олоҕо” хаһыат.

 

https://ulus.media/2019/11/20/ammalar-valerij-noevka-anammyt-yskamyajka-a-sibekki-d-rb-t-n-uurdular/