ЭМИСКЭ ЕКАТЕРИНА ЗАХАРОВА - САХА КҮӨРЭГЭЙЭ 100 СЫЛЫГАР АНАММЫТ СЫЛЫ АСТЫЛАР

 Эмис нэһилиэгэр биир дойдулаахтара, саха норуотун тапталлаах, талааннаах ырыаһыта Екатерина Захарова төрөөбүтэ 100 сылыгар аналлаах бастакы тэрээһин ыытылынна.

  Кылгас да кэмҥэ олордор норуотугар умнуллубат ырыалары хаалларан барбыт  Екатерина Афанасьевна Захарова- Саха күөрэгэйэ быйыл төрөөбүтэ 100 сыла. Бу бэлиэ тэрээһиҥҥэ Амма улууһугар араас тэрээһиннэр былааннаналлар. Олунньу 29 күнүгэр бу үбүлүөйдээх тэрээһин арыллыыта Эмис нэһилиэгэр буолан ааста. Манна кыттыыны РФ үтүөлээх артыыската, СӨ норуодунай артыыската Нина Чигирева, СӨ култуураҕа уонна духуобунаска туйгуна, норуоттар икки ардыларынааҕы академическай ырыа күрэҕин дипломана Екатерина Захарова, СӨ култуураҕа уонна духуобунаска министиэристибэтин ресурснай бырайыактыыр киинин режиссера Саргылана Адамова уонна да атын Екатерина Захарова аймахтара, кинини үйэтитиигэ үлэлэһэ сылдьар дьон Дьокуускайтан кэлэн кыттыыны ыллылар. Кинилэри эмистэр биир киэн туттар киһилэрэ, бары тэрээһиҥҥэ көхтөөх кыттыыы ылар, Екатерина Афанасьевна аймаҕа Анастасия Захарова салайан илдьэ кэллэ.

  Кэлбит ыалдьыттар ылбаҕай ырыаларын бэлэхтээтилэр, үтүө санааларын тириэртилэр. Эҕэрдэ тылы Амма улууһун баһылыгын социальнай боппуруостарга солбуйааччы Саргылана Назарова, Эмис нэһилиэгин баһылыга Илья Пестерев, үйэтитии улэтин саҕалаабыт, билигин да үлэлэһэ сылдьар дьон Амма Наахара нэһилиэгин баһылыга Мария Захарова, А.А. Черемных аатынан оҕо искусствотын дьиэтин фортепиано отделениетын учуутала, искусство билимин кандидата Виктория Григорьева уо.д.а. эттилэр. Виктория Георгиевна Екатерина Захарова ырыаларын мелодиятын туһунан интэриэһинэй иһитиннэриини оҥордо.

 

Ааптар: “Амма олоҕо” хаһыат.

https://ulus.media/2020/02/29/emiske-ekaterina-zaharova-saha-k-regeje-100-sylygar-anammyt-syly-astylar/